સાણંદ (ગુજરાત): भारतની સેમિકન્ડક્ટર યાત્રામાં આજે એક નવો સુવર્ણ અધ્યાય ઉમેરાયો છે. વડાપ્રધાન શ્રી નરેન્દ્રભાઈ મોદીએ ગુજરાતના સાણંદ ખાતે ₹૭,૬૦૦ કરોડના રોકાણથી બનેલા ‘સીજી સેમી’ (CG SEMI) આઉટસોર્સ્ડ સેમિકન્ડક્ટર એસેમ્બલી એન્ડ ટેસ્ટ (OSAT) પ્લાન્ટનું ભવ્ય ઉદ્ઘાટન કરી કમર્શિયલ ઉત્પાદનનો પ્રારંભ કરાવ્યો છે. આ અવસરે વડાપ્રધાને જાપાનની વૈશ્વિક કંપની ‘રેનેસાસ’ (Renesas) ને પ્રથમ ચિપ શિપમેન્ટ પણ સુપ્રત કર્યું હતું.
આ પ્રસંગે જનમેદનીને સંબોધતા વડાપ્રધાન શ્રી નરેન્દ્ર મોદીએ જણાવ્યું હતું કે, “આજનો આ કાર્યક્રમ પુરાવો છે કે ભારત જે પણ કરવાનો સંકલ્પ કરે છે, તેને દ્રઢતાપૂર્વક પૂર્ણ કરે છે. માર્ચ ૨૦૨૪માં આ પ્લાન્ટનો શિલાન્યાસ થયો હતો અને આજે અહીં કમર્શિયલ પ્રોડક્શન પણ શરૂ થઈ ગયું છે.”
વડાપ્રધાને વધુમાં ઉમેર્યું કે, આ ઇલેક્ટ્રોનિક્સ ક્રાંતિ રાતોરાત નથી આવી પરંતુ છેલ્લા એક દાયકાની લાંબાગાળાની નીતિઓનું પરિણામ છે. પહેલા પ્રોડક્ટ્સ, પછી કમ્પોનન્ટ્સ અને હવે સેમિકન્ડક્ટર્સ – ભારત સમગ્ર ઇલેક્ટ્રોનિક્સ વેલ્યુ ચેઇનનું નિર્માણ કરી રહ્યું છે, જે ‘વિકસિત ભારત ૨૦૪૭’ નો રોડમેપ છે.
મુખ્યમંત્રી શ્રી ભૂપેન્દ્ર પટેલે આ દાયકાને ભારત માટે સેમિકન્ડક્ટર અને ઇલેક્ટ્રોનિક્સ સેક્ટર્સનો ‘ટેકએડ’ ગણાવ્યો હતો. તેમણે ગર્વભેર જણાવ્યું કે, ગુજરાત વર્ષ ૨૦૨૨માં દેશની સૌથી પહેલી સેમિકન્ડક્ટર પોલિસી જાહેર કરનારું રાજ્ય છે અને ધોલેરામાં પણ વર્લ્ડ ક્લાસ ઇકોસિસ્ટમ તૈયાર થઈ રહી છે. સાણંદના આ પ્લાન્ટથી આગામી ૫ વર્ષમાં ૫,૦૦૦થી વધુ પ્રત્યક્ષ અને પરોક્ષ રોજગારીની તકોનું સર્જન થશે.
કેન્દ્રીય આઇટી મંત્રી શ્રી અશ્વિની વૈષ્ણવે વિશેષ ગર્વ સાથે જણાવ્યું કે, ઝારખંડ, છત્તીસગઢ અને જમ્મુ-કાશ્મીર જેવા રાજ્યોના ગ્રામીણ વિસ્તારોમાંથી આવેલી દીકરીઓ, જેમને વિશેષ તાલીમ માટે મલેશિયા મોકલવામાં આવી હતી, તેઓ આજે આ ક્લીન રૂમમાં રિયલ ચિપ્સ બનાવી રહી છે.
