જામનગર શહેરમાંથી એક અત્યંત ચોંકાવનારી અને હચમચાવી દે તેવી ઘટના સામે આવી છે. છેલ્લા બે વર્ષથી રહસ્યમય સંજોગોમાં ગુમ થયેલા જિગ્નેશ માવડિયા નામના યુવાનની હત્યા તેનો જ પત્નીએ પોતાના સાથીદારો સાથે મળીને કરી હોવાનું પોલીસ તપાસમાં બહાર આવ્યું છે. પોલીસે આ કેસમાં મૃતકની પત્ની પૃથ્વી ઉર્ફે ભૂમિ સહિત ત્રણ આરોપીઓની ધરપકડ કરી લીધી છે.
ઘટનાની વિગતવાર માહિતી આપતા પોલીસ સૂત્રોએ જણાવ્યું કે, જિગ્નેશ માવડિયા છેલ્લા બે વર્ષથી અચાનક ગાયબ થઈ ગયો હતો. જ્યારે પરિવારજનોએ તેની પૂછપરછ કરી ત્યારે તેની પત્ની પૃથ્વીએ સૌને ગેરમાર્ગે દોરવા માટે એવું ઝૂઠું વહેતું કર્યું હતું કે, જિગ્નેશ કામ અર્થે ઓસ્ટ્રેલિયા ચાલ્યો ગયો છે અને તે કોઈની સાથે ફોન કે સંપર્ક રાખવા માંગતો નથી. લાંબા સમય સુધી આ જ વાર્તા ચાલી રહી હતી, પરંતુ પરિવારને શંકા જતા મામલો પોલીસ સુધી પહોંચ્યો હતો.
જામનગરના પંચ ‘બી’ ડિવિઝન પોલીસ સ્ટેશનમાં મૃતકના મોટા ભાઈ અશોક ધરમશી માવડિયાએ ફરિયાદ નોંધાવી હતી. પોલીસ તપાસમાં ખૂલાસો થયો છે કે ૩૧ મે ૨૦૨૪ ના રોજ જિગ્નેશને સાયનાઈડ યુક્ત (ઝેરી) દારૂ પિવડાવીને મોતને ઘાટ ઉતારી દેવામાં આવ્યો હતો.
આ ખૂની ખેલને અંજામ આપવા માટે પત્ની પૃથ્વીએ નિલેશ મનસુખ કછટીયા અને તેના મિત્ર બલરામ દેવીરામ વર્માની મદદ લીધી હતી. ખાસ વાત એ છે કે જિગ્નેશ અને નિલેશે દારેડ જીઆઈડીસી (GIDC) વિસ્તારમાં ધંધો શરૂ કરવા માટે એક ફેક્ટરી લીઝ પર લીધી હતી. હત્યા બાદ આરોપીઓએ પુરાવા નાશ કરવા માટે આ જ ફેક્ટરીની અંદર ૧૨ ફૂટ ઊંડો ખાડો ખોદીને જિગ્નેશના શબને દફનાવી દીધું હતું.
ગુરુવારે સવારે પોલીસે આ સમગ્ર મર્ડર મિસ્ટ્રીનો પર્દાફાશ કરી દીધો છે. પોલીસે ઘટનાસ્થળેથી પુરાવા એકત્ર કરી પત્ની પૃથ્વી, નિલેશ કછટીયા અને બલરામ વર્માની ધરપકડ કરી કાયદેસરની કાર્યવાહી હાથ ધરી છે. આ ભયાનક અપરાધને કારણે સમગ્ર જામનગર પંથકમાં ભારે ચકચાર મચી ગઈ છે.
