રાજકોટ ગ્રામ્ય જિલ્લાના જેતપુરમાં પોલીસે ટેક્સ ચોરી અને છેતરપિંડીના મોટા કૌભાંડનો પર્દાફાશ કર્યો છે. પેસેન્જર ટ્રાવેલ્સમાં ડુપ્લીકેટ નંબર પ્લેટ લગાવી સરકારને કરોડોનો ચૂનો લગાવનારા ત્રણ આરોપીઓને પોલીસે ઝડપી પાડ્યા છે. જેતપુર ઉદ્યોગનગર પોલીસ સ્ટેશનની સર્વેલન્સ ટીમને બાતમી મળી હતી કે, એક જ રજીસ્ટ્રેશન નંબરની બે-બે બસો ચલાવીને સરકારી ટેક્સ ભરવામાં આવતો નથી. પોલીસે વોચ ગોઠવીને તપાસ કરતા ચોંકાવનારી હકીકત સામે આવી.
આરોપીઓએ બેંગ્લોરથી એજન્ટ મારફતે ચેસીસ મેળવી, બોડી બનાવી અને ખોટી નંબર પ્લેટ લગાવી બસો દોડાવી હતી. AR 01 U 9905 નંબરની શ્રી મહાલક્ષ્મી નામની બસ અને GJ 14 T 0932 નંબરની કુલ-4 બસો સહિત કુલ 11 વાહનો પકડાયા છે.
“આરોપીઓ એક જ નંબરથી વધુ બસો ચલાવીને RTO અને પોલીસને ગેરમાર્ગે દોરી રહ્યા હતા. ખોટા રજીસ્ટ્રેશનથી સરકારી ટેક્સની ચોરી કરી છેતરપિંડી આચરતા હતા.”
પોલીસે પાવનભાઈ જયસ્વાલ, અલ્પેશભાઈ જયસ્વાલ અને કૌશિકભાઈ જયસ્વાલ એમ ત્રણ આરોપીઓની ધરપકડ કરી છે. તેમની પાસેથી કુલ 1 કરોડ 55 લાખ 40 હજાર રૂપિયાનો મુદ્દામાલ કબજે કરાયો છે. જેમાં 1.15 કરોડની ખોટી નંબર પ્લેટવાળી બસ, 54 લાખની 4 બસો અને BNSS કલમ 106 મુજબ કબજે કરેલી અન્ય 5 બસોનો સમાવેશ થાય છે.આરોપીઓ વિરુદ્ધ ભારતીય ન્યાય સંહિતા-2023ની કલમ 318(4), 335(2), 335(3), 340(2), 54 તથા એમ.વી.એક્ટ 53C, 192 મુજબ ગુનો નોંધી વધુ તપાસ હાથ ધરાઈ છે.
