ગુજરાતમાં પુનઃ સક્રિય થયેલી ભારે વરસાદી સિસ્ટમને પગલે મોરબી જિલ્લા વહીવટી તંત્ર સજ્જ બન્યું છે. આગામી ૩ ઓગસ્ટ સુધી ભારે પવન અને અતિભારે વરસાદની આગાહી વચ્ચે કલેક્ટરશ્રી સ્વપ્નિલ ખરેના અધ્યક્ષસ્થાને સમીક્ષા બેઠક યોજાઈ હતી, જેમાં સંભવિત અસરગ્રસ્ત વિસ્તારોમાંથી નાગરિકો અને પશુઓનું સ્થળાંતર કરવા કડક આદેશો આપવામાં આવ્યા છે.
વરસાદી જોખમને ધ્યાનમાં રાખીને તમામ વિભાગીય અધિકારીઓ અને કર્મચારીઓની રજાઓ રદ કરી હેડક્વાર્ટર ન છોડવા તાકીદ કરાઈ છે. નદીકાંઠા અને નીચાણવાળા વિસ્તારોમાંથી નાગરિકો તેમજ પશુધનને સુરક્ષિત સ્થળે ખસેડવાની કામગીરી શરૂ કરી દેવાઈ છે. આશ્રયસ્થાન (શેલ્ટર હોમ્સ) ખાતે ભોજન, પીવાનું પાણી, વીજળી અને તબીબી સુવિધાઓનો પૂરતો સ્ટોક તૈયાર રાખવા આદેશ અપાયો છે.
બોટ, જેસીબી, પંપ અને જનરેટરનું મેપિંગ કરીને રેસ્ક્યુ ટીમોને સંવેદનશીલ સ્થળોએ તૈનાત કરાઈ છે. જોખમી માર્ગો અને કોઝ-વે પર વાહનવ્યવહાર બંધ કરી પોલીસ બંદોબસ્ત ગોઠવાયો છે. કટોકટી માટે ૨૪ કલાક કાર્યરત કંટ્રોલ રૂમ શરૂ કરવામાં આવ્યા છે જ્યાં વર્ગ-૧ના અધિકારીઓની નિમણૂંક કરાઈ છે. જિલ્લા વહીવટી તંત્ર દ્વારા નાગરિકોને અફવાઓથી દૂર રહેવા અને તંત્રની સત્તાવાર સૂચનાઓનું ચુસ્તપણે પાલન કરવા ખાસ અનુરોધ કરવામાં આવ્યો છે.?
