સોલાર સેક્ટર માટે કેન્દ્ર સરકારનો મોટો નિર્ણય: નેટ-મીટરિંગ અને ઓપન એક્સેસ પ્રોજેક્ટ્સની મુદત ડિસેમ્બર ૨૦૨૬ સુધી લંબાવાઈ
નવી દિલ્હી: દેશમાં સોલાર પાવર અને અક્ષય ઊર્જા (Renewable Energy) ક્ષેત્રે રોકાણ કરનારાઓ માટે કેન્દ્ર સરકાર તરફથી રાહતના સમાચાર આવ્યા છે. મિનિસ્ટ્રી ઓફ ન્યૂ એન્ડ રિન્યુએબલ એનર્જી (MNRE) દ્વારા શનિવારે એક સત્તાવાર નિવેદનમાં જણાવવામાં આવ્યું છે કે, સરકારે નેટ-મીટરિંગ અને ઓપન એક્સેસ સોલાર પ્રોજેક્ટ્સ માટેની મુક્તિ મર્યાદા લંબાવીને ૩૧ ડિસેમ્બર ૨૦૨૬ કરી દીધી છે.
સરકારે સ્પષ્ટ કર્યું છે કે ‘એપ્રુવ્ડ લિસ્ટ ઓફ મોડેલ્સ એન્ડ મેન્યુફેક્ચરર્સ’ (ALMM) લિસ્ટ-II ની મુખ્ય નીતિમાં કોઈ જનરલ કે બ્લેન્કેટ ફેરફાર કરવામાં આવ્યો નથી. સોલાર પીવી સેલ્સ (Solar PV Cells) માટેના કડક નિયમો યથાવત રહેશે, પરંતુ નેટ-મીટરિંગ અને ઓપન એક્સેસ હેઠળ આવતા ચોક્કસ પ્રોજેક્ટ્સને સમયસર કામ પૂરું કરવા માટે આ મર્યાદિત સમયની રાહત વિન્ડો આપવામાં આવી છે.
સરકારના આ નિર્ણયથી સ્થાનિક સોલાર મોડ્યુલ ઉત્પાદકોને મોટી રાહત મળશે. જેમણે પહેલેથી મોટો સ્ટોક કે ઇન્વેન્ટરી તૈયાર રાખી છે, તેમનું રોકાણ સુરક્ષિત રહેશે. આ ઉપરાંત, ભારતમાં સોલાર સેલ બનાવવાની ક્ષમતા સતત વધી રહી છે, તેથી સ્થાનિક કંપનીઓને ભારતીય ઉત્પાદકો પાસેથી સોર્સિંગ શરૂ કરવા માટે પૂરતો સમય મળી રહેશે.
મંત્રાલયના જણાવ્યા અનુસાર, આ પગલાનો મુખ્ય હેતુ ભારતીય સોલાર મેન્યુફેક્ચરિંગ ક્ષેત્રને પ્રોત્સાહન આપીને દેશને આત્મનિર્ભર બનાવવાનો અને ગ્લોબલ માર્કેટમાં ભારતની સ્થિતિ મજબૂત કરવાનો છે.
