જેતપુર: હવેલી પાસે જર્જરિત દીવાલ ધસી પડી; પાર્ક કરેલી ફોર-વ્હીલર દબાઈ, સદનસીબે જાનહાનિ ટળી

રાજકોટ જિલ્લાના જેતપુર શહેરમાંથી એક ચિંતાજનક પરંતુ સદનસીબે મોટી જાનહાનિ ટળી હોય તેવા સમાચાર સામે આવી રહ્યા છે. જેતપુરના ગોંડલ દરવાજા વિસ્તારમાં આવેલી હવેલીની બાજુમાં એક મોટી દુર્ઘટના સર્જાતા અટકી છે. અહીં આવેલ એક અત્યંત જર્જરિત મકાનની દીવાલ અચાનક પત્તાના મહેલની જેમ ધરાશાયી થઈ ગઈ હતી.
જેતપુરનો ગોંડલ દરવાજા વિસ્તાર હંમેશા લોકોની અવરજવરથી ધમધમતો હોય છે. અહીં હવેલીની બાજુમાં એક જૂનું અને જર્જરિત મકાન આવેલું હતું. આજે અચાનક જ આ મકાનની એક દીવાલ કડાકાભેર નીચે તૂટી પડી હતી. દીવાલ જે સમયે નીચે પડી ત્યારે જોરદાર અવાજ થતાં આસપાસના વિસ્તારમાં નાસભાગ મચી ગઈ હતી.
મોટી જાનહાનિ ટળી: સદનસીબે જે સમયે દીવાલ પડી ત્યારે ત્યાંથી કોઈ રાહદારી પસાર થઈ રહ્યું ન હતું, જેના કારણે એક બહુ મોટી દુર્ઘટના અને જાનહાનિ ટળી છે.
જો કે, આ અકસ્માતમાં દીવાલની બિલકુલ બાજુમાં પાર્ક કરીને રાખેલી એક ફોર-વ્હીલર (ગાડી) તેની ચપેટમાં આવી ગઈ હતી. ભારેખમ દીવાલ સીધી કાર પર પડવાના કારણે ગાડીનો કચ્ચરઘાણ વળી ગયો હતો અને ગાડીને ભારે નુકસાન થયું છે.