જેતપુર.રાજકોટ ગ્રામ્ય જિલ્લામાં પ્રોહિબિશન અને જુગાર જેવી ગેરકાયદેસર પ્રવૃત્તિઓને સદંતર નાબૂદ કરવા માટે પોલીસ દ્વારા કડક ઝુંબેશ હાથ ધરવામાં આવી છે. તેમાં લોકલ ક્રાઇમ બ્રાન્ચ (LCB) ની ટીમે જેતપુર તાલુકા પોલીસ સ્ટેશન વિસ્તારમાંથી દેશી દારૂનો એક મોટો કેસ શોધી કાઢવામાં સફળતા મેળવી છે.
મળતી માહિતી મુજબ,
રાજકોટ ગ્રામ્ય લોકલ ક્રાઈમ બ્રાન્ચના પોલીસ હેડ કોન્સ્ટેબલ મનીષભાઈ વરૂ, મનદીપસિંહ જાડેજા તથા કોન્સ્ટેબલ ભરતભાઈ ગમારા જેતપુર તાલુકા વિસ્તારમાં પેટ્રોલીંગમાં હતા. તે દરમિયાન ટેક્નિકલ સોર્સ અને ખાનગી બાતમીદારો પાસેથી ચોક્કસ હકીકત મળી હતી કે ચારણીયા ગામ પાસે જાહેર રોડ પરથી દારૂની હેરાફેરી થઈ રહી છે. બાતમીના આધારે પોલીસે વોચ ગોઠવીને ત્યાંથી પસાર થતી એક શંકાસ્પદ સ્વિફ્ટ ડિઝાયર કારને અટકાવી હતી.
પોલીસે કારની તલાશી લેતા તેમાંથી કોઈપણ પાસ-પરમિટ વગરનો આશરે ૭૫૫ લીટર દેશી દારૂ મળી આવ્યો હતો, જેની કિંમત ₹૧,૫૧,૦૦૦!
દેશી દારૂ: ૭૫૫ લીટર (કિંમત ₹૧,૫૧,૦૦૦/-)
સ્વિફ્ટ ડિઝાયર કાર: રજી. નં. GJ-03-CE-1820 (કિંમત ₹૨,૦૦,૦૦૦/-)
મોબાઈલ ફોન: ૨ નંગ (કિંમત ₹૧૦,૦૦૦/-)
પોલીસે આ કેસમાં બે આરોપીઓની ધરપકડ કરી છે, જ્યારે દારૂ સપ્લાય કરનાર ત્રીજા આરોપીને પકડવા ચક્રો ગતિમાન કર્યા છે:
૧. રાજ ઉર્ફે બાબર પ્રવીણભાઇ સરવૈયા (રહે. થાણા ગાલોલ, તા. જેતપુર) – આ આરોપી સામે અગાઉ પણ જેતપુર તાલુકા પો.સ્ટે.માં પ્રોહિબિશનનો ગુનો નોંધાયેલો છે.
૨. દેવશીભાઇ મેરામણભાઇ રાણાવાયા (રહે. બળદેવધાર, જેતપુર) – આ આરોપી નામચીન બુટલેગર છે અને તેની સામે અગાઉ જેતપુર સિટી અને જેતપુર તાલુકા પોલીસ સ્ટેશનમાં પ્રોહિબિશન એક્ટ હેઠળ ૧૧ જેટલા ગુનાઓ નોંધાઈ ચૂક્યા છે.
આ તમામ આરોપીઓ સામે જેતપુર તાલુકા પોલીસ સ્ટેશનમાં પ્રોહિબિશન એક્ટની કલમ ૬૫(ઇ), ૯૮(૨), ૮૧ મુજબ ગુનો નોંધી આગળની કાયદેસરની કાર્યવાહી હાથ ધરવામાં આવી છે.
