સુરેન્દ્રનગર જિલ્લામાં ગેરકાયદેસર ખનીજ ખનન કરનારા ભૂમાફિયાઓ સામે પોલીસે લાલ આંખ કરી છે. લીંબડી અને ચોટીલા ડિવિઝન પોલીસ તથા ખાણ ખનીજ વિભાગની સંયુક્ત ટીમે સાયલા અને થાનગઢ વિસ્તારમાં મોટા પાયે દરોડા પાડીને ગેરકાયદેસર કાર્બોસેલની ખાણો ઝડપી પાડી છે. આ કાર્યવાહીમાં પોલીસે ૩૦ કૂવા, ૧૦૦ મેટ્રિક ટન કાર્બોસેલ અને ૧૬ ટ્રેક્ટર સહિત રૂ. ૬૦ લાખનો મુદ્દામાલ સીઝ કર્યો છે. આ ઉપરાંત સ્થળ પરથી વિસ્ફોટક સામગ્રી પણ મળી આવતા પોલીસે ગુનો નોંધી વધુ તપાસ હાથ ધરી છે.
લીંબડી ડિવિઝનના ડીવાયએસપી વી. એમ. રબારીને મળેલી ચોક્કસ બાતમીના આધારે સાયલાના ચિત્રાલાંક અને થાનગઢના રાવરાણી ગામની સીમમાં ખાણ ખનીજ વિભાગને સાથે રાખીને દરોડા પાડવામાં આવ્યા હતા.
પોલીસ અને ખાણ ખનીજ વિભાગની અલગ-અલગ ટીમોએ સ્થળ પર ત્રાટકીને ગેરકાયદેસર કાર્બોસેલનું ખનન કરતા કુલ ૩૦ કૂવા ઝડપી પાડ્યા હતા. દરોડા દરમિયાન સ્થળ પરથી ૧૦૦ મેટ્રિક ટન કાર્બોસેલનો જથ્થો, ૩૦ લોખંડના પાઇપ અને ૫ બકેટ મળી કુલ રૂ. ૬૦ લાખનો મુદ્દામાલ સીઝ કરવામાં આવ્યો છે. આ સાથે જ ખનન પ્રવૃત્તિમાં વપરાતા ૧૬ ટ્રેક્ટરો જપ્ત કરી તેના વિરુદ્ધ એમ.વી. એક્ટ મુજબ કાયદેસરની કાર્યવાહી હાથ ધરાઈ છે.
સાયલાના ચિત્રાલાંક ગામની સીમમાં કૂવા પાસેથી ગેરકાયદેસર વિસ્ફોટક સામગ્રીનો જથ્થો પણ મળી આવ્યો છે. જેમાં ૧૩૧ નંગ જીલેટીન સ્ટીક અને ૩૯ નંગ ડિટોનેટર સહિત કુલ રૂ. ૨,૪૦૮ નો મુદ્દામાલ જપ્ત કરી સાયલા પોલીસ સ્ટેશનમાં એક્સપ્લોઝિવ એક્ટ હેઠળ બે ગુના દાખલ કરવામાં આવ્યા છે.









