રાજકોટ જિલ્લાના જેતપુર તાલુકાના ઐતિહાસિક અને વ્યૂહાત્મક રીતે અત્યંત મહત્વપૂર્ણ ગણાતા જેતલસર જંકશનના સર્વાંગી વિકાસ અને રેલવે સુવિધાઓના પુનઃસ્થાપનની માંગ સાથે ગ્રામજનોમાં ભારે રોષ જોવા મળી રહ્યો છે. લાંબા સમયથી પડતર રહેલી માંગણીઓ અંગે રેલવે તંત્ર દ્વારા કોઈ નક્કર નિર્ણય ન લેવાતા, આજે ‘જેતલસર જંકશન રેલવે બચાવ સમિતિ’ અને ગ્રામજનો દ્વારા ગામ સંપૂર્ણ બંધ રાખીને શાંતિપૂર્ણ રેલી યોજી ઉગ્ર વિરોધ પ્રદર્શન કરવામાં આવ્યું હતું.
ગ્રામજનોના જણાવ્યા અનુસાર, અગાઉ પણ રેલવે સુવિધાઓ અને લોકો લોબી તથા સ્ટાફને પરત લાવવા માટે ૧૦ દિવસ સુધી ભૂખ હડતાળ જેવું ઉગ્ર આંદોલન કરવામાં આવ્યું હતું. તે સમયે ધારાસભ્ય જયેશભાઈ રાદડિયાએ રૂબરૂ મુલાકાત લઈ ખાતરી આપી હતી અને નવી દિલ્હી ખાતે રેલવે મંત્રી અશ્વિની વૈષ્ણવ સાથેની બેઠક બાદ પશ્ચિમ રેલવેના અધિકારીઓએ બે મહિનામાં હકારાત્મક નિર્ણય લેવાનું આશ્વાસન આપ્યું હતું. જોકે, આજદિન સુધી કોઈ નિર્ણય ન આવતા ગ્રામજનો ફરી આંદોલનના માર્ગે વળ્યા છે.
સરપંચશ્રી અને સમિતિના આગેવાનોએ જણાવ્યું કે, જેતલસર જંકશન ચારેય દિશામાં રેલ સંપર્ક ધરાવતું મહત્વનું કેન્દ્ર છે, પરંતુ અહીંથી ધીમે-ધીમે રેલવે ડિપાર્ટમેન્ટ્સ અને રનિંગ સ્ટાફને અન્યત્ર ખસેડી દેવામાં આવતા સ્થાનિક વેપાર-રોજગાર સંપૂર્ણપણે ઠપ થવાની અણી પર છે. જો સુવિધાઓ પરત નહીં લવાય તો સ્થાનિક પરિવારો અને વેપારીઓ સામે આજીવિકાનો મોટો પ્રશ્ન ઊભો થશે.
રેલવે પ્રશાસન સમક્ષ મુકાયેલી ૭ મુખ્ય માંગણીઓ:
૧. જેતલસર ખાતે ART અને ARME નું હેડક્વાર્ટર સ્થાયી રૂપે સ્થાપિત કરવું.
૨. ટ્રેનોના યોગ્ય મેઈન્ટેનન્સ માટે ‘પિટ લાઈન’ વિકસાવવી.
૩. C&W વિભાગની સુવિધાઓ અને પૂરતો સ્ટાફ ઉપલબ્ધ કરાવવો.
૪. જેતલસર ખાતે ઈલેક્ટ્રિક લોકો શેડની સ્થાપના કરવી.
૫. પ્લેટફોર્મ નંબર ૫ નો યોગ્ય ઉપયોગ કરી લાંબા અંતરની મેલ/એક્સપ્રેસ ટ્રેનોનું સંચાલન શરૂ કરવું.
૬. રેલવેની વિશાળ પડતર જમીન અને ઉપલબ્ધ પરિસંપત્તિઓનો મહત્તમ ઉપયોગ કરી જંકશનનો સર્વાંગી વિકાસ કરવો.
૭. લોકો લોબી સહિતનો તમામ સ્ટાફ તાત્કાલિક જેતલસર પરત લાવવો.
ગ્રામજનોએ ચીમકી ઉચ્ચારી છે કે જો આગામી સમયમાં રેલવે તંત્ર દ્વારા સત્વરે યોગ્ય નિર્ણય લેવામાં નહીં આવે, તો આંદોલનને વધુ ઉગ્ર બનાવવામાં આવશે.









