સુરેન્દ્રનગરના પંડિત દીનદયાળ ઉપાધ્યાય ટાઉન હોલ ખાતે આજે ‘પીએમ કિસાન ઉત્સવ દિવસ’ની ભવ્ય ઉજવણી કરવામાં આવી. કાર્યક્રમમાં શહેરી વિકાસ અને શહેરી ગૃહનિર્માણ મંત્રી દર્શનાબેન વાઘેલા અધ્યક્ષસ્થાને રહ્યાં હતાં.
વડાપ્રધાન નરેન્દ્ર મોદીએ બનાસકાંઠા જિલ્લાના ડીસા તાલુકાના ભીલડીથી વર્ચ્યુઅલ માધ્યમથી જોડાઈને પીએમ કિસાન સન્માન નિધિ યોજના અંતર્ગત 24મા હપ્તાનું વિતરણ કર્યું. આ પ્રસંગે સુરેન્દ્રનગર જિલ્લાના 1 લાખ 60 હજારથી વધુ ખેડૂતોના બેંક ખાતામાં કુલ રૂ. 32.10 કરોડથી વધુની સહાય ડીબીટી મારફતે સીધી જમા કરવામાં આવી.
દેશવ્યાપી સ્તરે પ્રધાનમંત્રીએ આશરે રૂ. 19,000 કરોડનો 24મો હપ્તો રિલીઝ કર્યો હતો, જેમાં પાત્ર ખેડૂત પરિવારોને રૂ. 2,000ની કિસ્ત મળી.
કાર્યક્રમને સંબોધતાં મંત્રી દર્શનાબેન વાઘેલાએ કહ્યું કે ખેડૂત આપણો અન્નદાતા છે. તેમણે ઉમેર્યું કે પીએમ કિસાન યોજના હેઠળ ખેડૂતોને વાર્ષિક રૂ. 6,000ની આર્થિક સહાય સીધા બેંક ખાતામાં મળે છે, જેથી વચેટિયાઓની જગ્યા રહેતી નથી.
સુરેન્દ્રનગર જિલ્લામાં આ પ્રસંગે જિલ્લા પંચાયત, તાલુકા પંચાયત અને નગરપાલિકા કક્ષાએ કુલ 65 કાર્યક્રમો યોજાયા હતા, જેમાં અંદાજે 67 હજાર ખેડૂતો જોડાયા હતા.









