અમરેલી જિલ્લાના મોટી કુંકાવાવ મુકામે સમગ્ર શિક્ષા અભિયાન અંતર્ગત અંદાજે રૂ. ૧.૧૪ કરોડના ખર્ચે આકાર પામેલી ‘શ્રી પેસેન્ટર કન્યા શાળા-૨’ અને રૂ. ૧.૨૬ કરોડના ખર્ચે નવનિર્મિત ‘શ્રી ભક્તિનગર પ્રાથમિક શાળા’ ના સુવિધાસભર ભવનોને રાજ્યમંત્રી શ્રી કૌશિકભાઈ વેકરીયાએ રિબન કાપીને વિદ્યાર્થીઓ અને ગ્રામજનો માટે લોકાર્પિત કર્યા હતા.
ગ્રામ્ય વિસ્તારના બાળકોને વૈશ્વિક સ્તરનું શૈક્ષણિક વાતાવરણ મળી રહે તે માટે આ નવી શાળાઓમાં અત્યાધુનિક ડિજિટલ સ્માર્ટ ક્લાસ રૂમ, સ્માર્ટ સ્ટડી બોર્ડ અને ટેકનોલોજીના જ્ઞાન માટે ખાસ કોમ્પ્યુટર લેબ તૈયાર કરવામાં આવી છે. આ ઉપરાંત વિદ્યાર્થીઓના સ્વાસ્થ્યને ધ્યાનમાં રાખીને શુદ્ધ પીવાનું પાણી અને ઉત્કૃષ્ટ સેનિટેશન બ્લોક જેવી પાયાની સુવિધાઓ પણ ઉપલબ્ધ કરાવાઈ છે.
આ પ્રસંગે ઉપસ્થિત જનમેદનીને સંબોધતા રાજ્યમંત્રી શ્રી કૌશિકભાઈ વેકરીયાએ જણાવ્યું હતું કે, રાજ્ય સરકાર ગ્રામ્ય સ્તરે શિક્ષણનું સ્તર ઊંચું લાવવા અને કન્યા કેળવણીને પ્રોત્સાહન આપવા માટે હંમેશાં કટિબદ્ધ છે. મંત્રીશ્રીએ ભારપૂર્વક જણાવ્યું હતું કે, દરેક બાળકના વાલીઓએ પોતાના સંતાનોને સરકારી શાળાઓમાં શિક્ષણ અપાવવાનો આગ્રહ રાખવો જોઈએ, કારણ કે આજે સરકારી શાળાઓ ખાનગી શાળાઓને ટક્કર આપે તેવી આધુનિક સુવિધાઓથી સજ્જ બની છે.
આ લોકાર્પણ સમારોહમાં મોટી કુંકાવાવ એ.પી.એમ.સી.ના ચેરમેન શ્રી ગોપાલભાઈ અંટાળા, મોટી કુંકાવાવના સરપંચ શ્રી સંજયભાઈ લાખાણી, તાલુકા પંચાયતના હોદ્દેદારો, શાળાના આચાર્યો, શિક્ષકો તેમજ બહોળી સંખ્યામાં ગ્રામજનો અને ઉત્સાહી વાલીઓ ઉપસ્થિત રહ્યા હતા.









