ગાંધીનગરમાં નાગરિક સુવિધાઓને વધુ સુદૃઢ બનાવવા અને વહીવટી કામગીરીમાં પારદર્શિતા જાળવવાના ઉદ્દેશથી ગાંધીનગર મહાનગરપાલિકાના ઇન્ટીગ્રેટેડ કમાન્ડ એન્ડ કંટ્રોલ સેન્ટર, એટલે કે ICCCની મેયર રૂપસિંગ ઠાકોરે સરપ્રાઈઝ મુલાકાત લીધી હતી.
મુલાકાત દરમિયાન મેયરે હેલ્પલાઇન વિભાગની કામગીરીનું નિરીક્ષણ કર્યું અને અરજદાર સાથે સીધો સંપર્ક સાધી તેમની ફરિયાદનું નિવારણ થયું છે કે નહીં તેની ચકાસણી કરી. તેમણે કહ્યું કે ફરિયાદ માત્ર રજિસ્ટર થાય કે ક્લોઝ થાય તે પૂરતું નથી; નાગરિકને વાસ્તવિક ઉકેલ મળવો જરૂરી છે.
ગાંધીનગરના ICCCમાં ટ્રાફિક વ્યવસ્થાપન, સર્વેલન્સ, કચરા વ્યવસ્થાપન, ઇમર્જન્સી સેવાઓ અને પર્યાવરણ સંબંધી ડેટાને એક કેન્દ્રિય પ્લેટફોર્મ પર મોનિટર કરવામાં આવે છે. મેયરે આધુનિક ટેક્નોલોજીના ઉપયોગ થકી શહેરી વ્યવસ્થાપનને વધુ કાર્યક્ષમ, પારદર્શક અને નાગરિકલક્ષી બનાવવાના પ્રયાસોની સરાહના કરી હતી.









