જેતપુર.સોનમ વાંગચુક દ્વારા ચલાવવામાં આવી રહેલા આંદોલનના સમર્થનમાં હવે ગુજરાતના યુવાનો પણ મેદાને આવ્યા છે. રાજકોટ જિલ્લાના જેતપુરમાં યુવાનોએ રસ્તા પર ઉતરીને સોનમ વાંગચુકને પોતાનું પૂર્ણ સમર્થન જાહેર કર્યું હતું. યુવાનોએ શાસકોને જગાડવા માટે એકસૂરે બુલંદ નારેબાજી કરી વાતાવરણ ગજવી મૂક્યું હતું.
જેતપુરના મુખ્ય માર્ગો પર આજે એક અનોખો માહોલ જોવા મળ્યો હતો.
સ્થાનિક યુવાનો હાથમાં ‘I Support Sonam Wangchuk’ લખેલા પ્લેકાર્ડ્સ સાથે એકઠા થયા હતા. યુવાનોએ જણાવ્યું હતું કે, સોનમ વાંગચુક જે લડાઈ લડી રહ્યા છે તે માત્ર કોઈ એક ચોક્કસ રાજ્ય કે વિસ્તાર પૂરતી સીમિત નથી. આ લડાઈ દેશની અખંડિતતા, સરહદોની સુરક્ષા, હિમાલયના અમૂલ્ય ગ્લેશિયર્સ અને દેશના કરોડો લોકોની પાણીની સુરક્ષા સાથે જોડાયેલી રાષ્ટ્રીય લડાઈ છે.
વિરોધ પ્રદર્શન દરમિયાન આક્રોશ વ્યક્ત કરતા જેતપુરના યુવાનોએ સત્તાના નશામાં ચૂર શાસકોને ખુલ્લો પડકાર ફેંક્યો હતો. યુવાનોએ ગર્જના કરતા જણાવ્યું હતું કે:
“તમે જે ઉપર દિલ્હીની ગાદીઓ પર બેઠા છો તે કાન ખોલીને સાંભળી લો… સોનમ વાંગચુક એકલા નથી, હિન્દુસ્તાનનો ખૂણે-ખૂણો અને દેશનો આખો યુવા વર્ગ તેમની સાથે ખભેથી ખભા મિલાવીને ઊભો છે. સરહદની સુરક્ષા અને દેશના પર્યાવરણ સાથે થઈ રહેલી છેડછાડને દેશનો જાગૃત યુવા ક્યારેય સહન નહીં કરે.”
પર્યાવરણ અને સરહદની રક્ષા કાજે લદ્દાખથી શરૂ થયેલી આ ચળવળ હવે ધીમે-ધીમે સમગ્ર દેશમાં પ્રસરી રહી છે. જેતપુરના યુવાનોએ આજે જે રીતે રસ્તા પર ઉતરીને પોતાનો અવાજ ઉઠાવ્યો છે, તે સાબિત કરે છે કે આ લડાઈ હવે માત્ર લદ્દાખ પૂરતી મર્યાદિત ન રહેતા એક પ્રચંડ ‘જન-આંદોલન’નું સ્વરૂપ ધારણ કરી ચૂકી છે. આગામી દિવસોમાં જો સરકાર સોનમ વાંગચુકની માંગણીઓ પ્રત્યે યોગ્ય વલણ નહીં અપનાવે, તો આ આંદોલન વધુ ઉગ્ર બનશે તેવી ચીમકી પણ યુવાનો દ્વારા ઉચ્ચારવામાં આવી છે.
