સાઉથ સિનેમાના સુપરસ્ટાર રજનીકાંતની બહુપ્રતિક્ષિત ફિલ્મ ‘જેલર 2’ હાલ થિયેટરોમાં ધૂમ મચાવી રહી છે. તમિલ અને હિન્દી બેલ્ટમાં જબરદસ્ત સફળતા મેળવ્યા બાદ, ફિલ્મે હવે તેલુગુ બોક્સ ઓફિસ પર પણ ટંકશાળ પાડી દીધી છે. તેલુગુ માર્કેટમાં આ ફિલ્મે વર્ષ 2026ની ટોચની પાંચ ફિલ્મોના આંકડાને પાછળ ધકેલી દઈ છઠ્ઠા નંબરની સૌથી વધુ કમાણી કરનારી ફિલ્મનો ખિતાબ પોતાના નામે કર્યો છે.
તેલુગુમાં 81 કરોડથી વધુની કમાણી
બોક્સ ઓફિસ ટ્રેકર ‘સેકનિલ્ક’ના ડેટા અનુસાર, ‘જેલર 2’એ તેલુગુ ભાષામાં અત્યાર સુધીમાં આશરે ₹81.70 કરોડનો બિઝનેસ કરી લીધો છે. આ શાનદાર કમાણી સાથે જ તેણે ‘ઉસ્તાદ ભગત સિંહ’ (₹72.38 કરોડ), ‘માં ઇંટિ બંગારમ’ (₹62 કરોડ), ‘રણબાલી’ (₹57.3 કરોડ), ‘અનગાનગા ઓકા રાજુ’ (₹53.9 કરોડ) અને ‘લેનિન’ જેવી મોટી તેલુગુ ફિલ્મોના રેકોર્ડ તોડી નાખ્યા છે.
15 દિવસમાં ઓલ-ઇન્ડિયા ₹429 કરોડ પાર
માત્ર પ્રાદેશિક જ નહીં, પરંતુ રાષ્ટ્રીય સ્તરે પણ ફિલ્મનો સપાટો યથાવત્ છે. ‘જેલર 2’એ ભારતમાં પ્રથમ સપ્તાહે ₹334.35 કરોડ અને બીજા સપ્તાહે ₹95.20 કરોડનો નેટ બિઝનેસ કર્યો હતો. આ સાથે જ ભારતીય બોક્સ ઓફિસ પર માત્ર 15 દિવસની અંદર આ ફિલ્મનું કુલ નેટ કલેક્શન ₹429.55 કરોડ સુધી પહોંચી ગયું છે.
નોંધનીય છે કે, ‘જેલર 2’ એ વર્ષ 2023ની મેગા બ્લોકબસ્ટર ‘જેલર’ની સિક્વલ છે. ફિલ્મમાં રજનીકાંત સાથે રમ્યા કૃષ્ણન, મોહનલાલ, જેકી શ્રોફ, વિદ્યા બાલન અને મિથુન ચક્રવર્તી જેવા દિગ્ગજ કલાકારો સ્ક્રીન શેર કરી રહ્યા છે. દર્શકો તરફથી મળી રહેલા જબરદસ્ત પ્રતિસાદને જોતાં આગામી દિવસોમાં ફિલ્મ વધુ નવા આંકડા સ્થાપિત કરે તેવી શક્યતા છે.









