રાજકોટ જિલ્લાના જેતપુર પંથકમાં વન્યજીવોની દહેશત સામે આવી છે. જેતપુરના ખારચિયા ગામે આજે વહેલી સવારે એક માલધારીના રહેણાંક મકાનમાં સિંહ ઘૂસી આવ્યો હતો. સાવજે ઘરની દીવાલ કૂદી અંદર બાંધેલા નિર્દોષ બકરાનું મારણ કરતાં સમગ્ર ગામમાં ભયનો માહોલ ફેલાયો છે.
જેતપુર તાલુકાનું ખારચિયા ગામ આજે વહેલી સવારે સિંહના ત્રાટકવાથી થથરી ઊઠ્યું. વહેલી સવારના નીરવ શાંતિ વચ્ચે એક સાવજ માલધારીના રહેણાંક વિસ્તાર સુધી પહોંચી ગયો હતો. ઘટનાસ્થળે માટીમાં સિંહના તાજા પંજાના નિશાન પણ સ્પષ્ટપણે જોવા મળ્યા હતા, જેનાથી ગામમાં સિંહ આવ્યાની પુષ્ટિ થઈ હતી.
સ્થાનિક વિગતો મુજબ, સિંહે મકાનની ઊંચી દીવાલ કૂદીને અંદર પ્રવેશ કર્યો હતો. ત્યાં વાડામાં બાંધેલા બકરા પર તરાપ મારી તેને ઉઠાવી ગયો હતો. ત્યારબાદ રહેણાંક વિસ્તાર નજીક જ તેનું મારણ કરી સિંહ ત્યાંથી નાસી છૂટ્યો હતો. સવારે જ્યારે પરિવારજનો જાગ્યા ત્યારે દીવાલ કૂદવાના અને પંજાના નિશાન જોઈ સમગ્ર ઘટના સામે આવી હતી.
આ ઘટના બાદ માલધારીઓ તેમજ ગ્રામજનોમાં ભારે ફફડાટ વ્યાપી ગયો છે. સ્થાનિક લોકોના જણાવ્યા અનુસાર, છેલ્લા ઘણા દિવસોથી આ વિસ્તારમાં સિંહની અવરજવર સતત જોવા મળી રહી છે. રહેણાંક વિસ્તાર સુધી વન્યજીવ પહોંચી જતાં લોકો પોતાના પરિવાર અને પશુધનની સુરક્ષાને લઈને ચિંતિત બન્યા છે. હવે ગ્રામજનોની માગ છે કે વન વિભાગ તાત્કાલિક પેટ્રોલિંગ વધારી પાંજરૂં મૂકે જેથી કોઈ મોટી જાનહાનિ ટાળી શકાય.









