સરકારી બાબુઓ પણ ન બચ્યા! ગુજરાતમાં ૧ મહિનાની હેલ્મેટ ડ્રાઈવમાં ₹૫.૨૧ કરોડનો દંડ, DGP મલિકે કહ્યું- ‘દંડ લક્ષ્ય નથી, જિંદગી બચાવવી છે’
ગાંધીનગર: ગુજરાતમાં માર્ગ અકસ્માતોમાં કિંમતી જિંદગીઓ બચાવવા અને નાગરિકોમાં ટ્રાફિક સેન્સ કેળવવા માટે રાજ્ય સરકાર અને પોલીસ વિભાગ દ્વારા ૧ થી ૩૧ મે દરમિયાન એક મહિનાની વિશેષ “હેલ્મેટ ડ્રાઇવ” યોજવામાં આવી હતી. નાયબ મુખ્યમંત્રી શ્રી હર્ષ સંઘવીના માર્ગદર્શન હેઠળ યોજાયેલી આ ઝુંબેશના આંકડા અને વિગતો જાહેર કરવામાં આવી છે, જેમાં સામાન્ય નાગરિકોની સાથે સરકારી અધિકારીઓ સામે પણ લાલઆંખ કરવામાં આવી છે.
“દંડ વસૂલવો એ લક્ષ્ય નથી, જિંદગી બચાવવી એ અમારો સંકલ્પ”
આ વિશેષ ઝુંબેશ અંગે રાજ્યના પોલીસ વડા (DGP) શ્રી જી.એસ.મલિકે જણાવ્યું કે, “દંડ વસૂલવો એ ગુજરાત પોલીસનું લક્ષ્ય નથી, પરંતુ ગુજરાતના પ્રત્યેક નાગરિકની સુરક્ષા સુનિશ્ચિત કરવાનો છે. વાહનચાલકો અને પાછળ બેસનાર વ્યક્તિ માત્ર પોલીસના ડરથી કે દંડથી બચવા માટે નહીં, પરંતુ પોતાના પરિવારની ખુશીઓ માટે હેલ્મેટ અને સીટ બેલ્ટ અચૂક પહેરે.” તેમણે ઉમેર્યું કે માર્ગ સુરક્ષા એ માત્ર પોલીસની જ નહીં, આપણા સૌની સામૂહિક જવાબદારી છે.
નિયમ બધા માટે સરખો: પકડાયા ૫,૦૦૦થી વધુ સરકારી કર્મચારીઓ
ટ્રાફિકના નિયમો માત્ર સામાન્ય નાગરિકો માટે જ નહીં પણ દરેક માટે સમાન છે તે આ ડ્રાઈવ દરમિયાન સાબિત કરવામાં આવ્યું છે. સરકારી કચેરીઓના પ્રવેશદ્વારે જ ટ્રાફિક પોલીસ તૈનાત કરવામાં આવી હતી. નિયમભંગ કરનારા ૫,૧૨૩ સરકારી અધિકારીઓ અને કર્મચારીઓ સામે પણ દંડનીય કાર્યવાહી કરીને તેમની પાસેથી કુલ રૂ. ૧૬.૫૮ લાખનો દંડ વસૂલવામાં આવ્યો છે.
આંકડાની નજરે એક મહિનાની મહાઝુંબેશ:
સ્ટેટ ટ્રાફિક બ્રાન્ચ દ્વારા આપવામાં આવેલી માહિતી અનુસાર, રાજ્યભરમાં યોજાયેલી આ ઝુંબેશ દરમિયાન કુલ દંડનીય કાર્યવાહીની વિગતો નીચે મુજબ છે:
| વિગત | આંકડા |
| કુલ દંડાયેલા વાહનચાલકો | ૧.૮૮ લાખથી વધુ |
| કુલ વસૂલાયેલો દંડ | રૂ. ૫.૨૧ કરોડ |
| દંડાયેલા સરકારી કર્મચારીઓ | ૫,૧૨૩ |
| સરકારી કર્મચારીઓ પાસેથી વસૂલાત | રૂ. ૧૬.૫૮ લાખ |
હેલ્મેટ ન પહેરવાનું પરિણામ: આજીવન વસવસો
અકસ્માતોના અનેક કિસ્સાઓમાં જોવા મળ્યું છે કે માત્ર એક હેલ્મેટના કારણે વાહનચાલકનો જીવ આબાદ બચી જાય છે. જ્યારે હેલ્મેટ ન પહેરવાના કારણે અનેક પરિવારોએ પોતાના વ્હાલસોયા સ્વજન ગુમાવ્યા છે અને આજીવન વસવસો ભોગવવો પડે છે. ગુજરાત પોલીસ નથી ઈચ્છતી કે કોઈ પણ પરિવાર આવો આઘાત સહન કરે. આ ડ્રાઈવ દરમિયાન પોલીસે માત્ર દંડ નથી કર્યો, પરંતુ નિયમભંગ કરનારને ગુલાબનું ફૂલ કે હેલ્મેટ આપીને ગાંધીગીરીથી તેનું મહત્વ પણ સમજાવ્યું છે. (https://gujaratinformation.gujarat.gov.in/)
