રાજકોટ/ધોરાજી: ગુજરાત પોલીસ માટે રાષ્ટ્રીય કક્ષાએ ગૌરવની ક્ષણ આવી છે. ધોરાજીના ASP સુશ્રી સિમરન ભારદ્વાજને કેન્દ્રીય ગૃહમંત્રી દક્ષતા પદક–2026 માટે પસંદ કરાયા છે. કેન્દ્રીય ગૃહ મંત્રાલયે રાષ્ટ્રીય એકતા દિવસની ઉજવણી નિમિત્તે દેશભરના 490 પોલીસ અધિકારીઓ અને કર્મચારીઓને આ પદક આપવાની જાહેરાત કરી છે, જેમાં ગુજરાતના છ અધિકારીઓનો સમાવેશ થાય છે.
ASP સિમરન ભારદ્વાજને આ સન્માન મળવા પાછળ એક અત્યંત સંવેદનશીલ અને ગંભીર ગુનાના કેસમાં તેમની ઝડપી, નિષ્પક્ષ અને અસરકારક તપાસ કામગીરીનો મહત્વનો ફાળો રહ્યો છે. આટકોટ પોલીસ સ્ટેશનના ગુ.ર.નં. 0570/2025 અંતર્ગત 6 વર્ષ 8 માસની માસૂમ બાળકી સામે થયેલા દુષ્કૃત્યના આરોપીને પોલીસે નાસી છૂટ્યા પછી પણ ઝડપથી ધરપકડ કરી હતી. ત્યારબાદ માત્ર 12 દિવસમાં કોર્ટમાં મજબૂત ચાર્જશીટ રજૂ કરવામાં આવી હતી.
આ કેસમાં ASP સિમરન ભારદ્વાજની દેખરેખ હેઠળ થયેલી તપાસ અને કાયદાકીય કાર્યવાહીને કારણે માત્ર 40 દિવસના ટૂંકા સમયમાં આરોપીને ફાંસીની સજા ફટકારવામાં આવી હોવાનું જણાય છે. આ સિદ્ધિ પીડિત બાળકી અને તેના પરિવાર માટે ન્યાય મળવાનું મહત્વનું પગલું ગણાય છે, તેમજ પોલીસ તંત્રની સંવેદનશીલતા અને કાર્યક્ષમતાનું ઉદાહરણ પણ છે.
IPS 2022 બેચના અધિકારી સિમરન ભારદ્વાજ હાલ ધોરાજી, રાજકોટના ASP તરીકે ફરજ બજાવી રહ્યા છે. IPSની સિવિલ લિસ્ટ–2026 અનુસાર તેમની હાલની નિમણૂક ASP, Dhoraji, Rajkot તરીકે નોંધાઈ છે.
કેન્દ્રીય ગૃહમંત્રી દક્ષતા પદક પોલીસ વિભાગમાં ઉત્કૃષ્ટ સેવા, કર્તવ્યનિષ્ઠા, સાહસ અને વિશેષ કાર્યક્ષમતા બદલ આપવામાં આવે છે. આ સન્માન સિમરન ભારદ્વાજની તપાસ કુશળતા, સમર્પણ અને પીડિત માટે ન્યાય મેળવવાની પ્રતિબદ્ધતાને રાષ્ટ્રીય સ્તરે માન્યતા આપે છે.
ગુજરાત પોલીસ માટે આ સિદ્ધિ માત્ર એક એવોર્ડ નથી, પરંતુ સમાજના સૌથી નબળા વર્ગ માટે ન્યાય સુનિશ્ચિત કરવાની પોલીસની પ્રતિબદ્ધતાનું પ્રતીક પણ છે. ASP સિમરન ભારદ્વાજની આ કામગીરીએ સાબિત કર્યું છે કે સંવેદનશીલ ગુનાઓમાં ઝડપી તપાસ, પુરાવાની મજબૂત રજૂઆત અને કાયદાકીય પ્રક્રિયામાં સતત પ્રયાસથી ન્યાય ઝડપથી મળી શકે છે.









